Måned: oktober 2026

Mangfald og inkludering – millionstøtte frå Forskingsrådet

HVO har fått ein million kroner frå Forskingsrådet til satsinga «Vidsyn for framtida: Mangfald og inkludering ved HVO», som går frå 2026 til 2028. Arbeidet byggjer vidare på prosjektet«Likskap i sikte» (2024–2025), der delen kvinnelege professorar og dosentar auka frå 25 til 41,5 prosent. Den nye satsinga skal utvikle ein leiings- og organisasjonskultur med større medvit om mangfald og inkludering, og motivere tilsette med ulik bakgrunn til å velje ein akademisk karriereveg. Verkemidla er møteplassar, dialogverkstader, seminar og dialogbasert læring. Førstelektor Leif Longvanes og seniorrådgivar Solbjørg Nossen Leite har eit særleg ansvar i prosjektet, og fleire fagmiljø og delar av fellesadministrasjonen er involverte.

Opptaket hausten 2026

Søkjartala gjennom Samordna opptak gjekk ned ved HVO i år, med om lag fem prosent færre søkjarar enn i fjor, medan søkinga nasjonalt gjekk opp med vel seks prosent. Gjennom Samordna opptak fekk likevel fleire tilbod om studieplass enn i fjor, medan talet gjekk noko ned i det lokale opptaket. Så langt har så vidt fleire søkarar registrert seg som student enn i fjor – vel 2 700 har registrert seg og betalt semesteravgift, litt over tilsvarande tal for i fjor.

Lærarutdanningane går i ulik retning. Grunnskulelærarutdanningane hadde oppgang i søkinga i hovudopptaket, tydelegast på 1.–7. trinn, medan 5.–10. trinn ligg om lag som i fjor. Det er ei anna utvikling enn den nasjonale trenden for desse utdanningane. Barnehagelærarutdanningane har nedgang både i søking og i ja-svar. Barnehagelærar er eit yrke både vi og Kunnskapsdepartementet arbeider for å få fleire søkjarar til, og utviklinga følgjer vi tett.

Tala er førebelse. Resultata frå restetorget er ikkje kvalitetssikra, og endelege møtt-tala ligg ikkje føre enno. Styret får eigen rapport om opptaket i seinare møte.

Medlemskap i Vest-Norges Brusselkontor

Medlemskapet i Vest-Norges Brusselkontor er no formelt på plass, og HVO er den tredje høgskulen i nettverket. Styret handsama saka før sommaren, så dette er ei stadfesting av at vi er inne. Gjennom kontoret får fagmiljøa våre tilgang til europeiske samarbeidsmoglegheiter saman med kommunar, fylke og næringsliv frå heile Vest-Noreg. Verdien ligg ikkje i medlemskapet i seg sjølv, men i arbeidet framover med å utvikle samarbeidet og gjere det til noko fagmiljøa faktisk nyttar.

Suppleringsval – vararepresentant for dei vitskapleg tilsette

Valstyret har gjennomført suppleringsval til den siste varaplassen for dei vitskapleg tilsette, der seks kandidatar stilte til val. Valresultatet er godkjent, og Veronica Kvalen Pilskog er vald som 3. vararepresentant for dei vitskapleg tilsette for resten av styreperioden 2023–2027. Eg gratulerer, og takkar alle som stilte til val.

Dei siste dagane har det vore mange nyhender om Aasenkvartalet, og det er mykje som er uvisst. Ein ting som ikkje er uvisst, er Høgskulen i Volda si interesse i og velvilje til prosjektet. Prosjektet vil styrke både regionen og høgskulen. 

Høgskulen i Volda er ein statleg etat. Det vil seie at vi ikkje kan leige areal utan å gå via utlysing av anbod med Statsbygg som rådgjevar. Aasenkvartalet ville vore ein naturleg kandidat i ein slik konkurranse. Men sjølv om Aasenkvartalet leverte inn eit tilbod, så måtte alle innleverte tilbod nøytralt vurderast opp mot kriteria i utlysinga. Høgskulen har altså aldri kunna garantere ei framtidig leige i Aasenkvartalet. Signala om at høgskulen trengde nye areal har tidlegare vore tydelege. Men gitt dei noverande økonomiske utsiktene og dei kjende behova til høgskulen, så ser vi ikkje for oss å leige meir areal enn det vi allereie har. Kunnskapsdepartementet forventar også at vi brukar areala vi har betre framfor å byggje nytt, og for ein statleg høgskule er det ikkje valfritt. Så per i dag er det vanskeleg å sjå for seg at høgskulen skal auke arealet vi disponerer i den næraste tida. 

Vi er like fullt svært positive til Aasenkvartalet. Med næringsliv og offentlege verksemder rett ved sida av høgskulen kan kvartalet gje høgskulen og arbeidslivet fleire og tettare møtepunkt. Der kan ein gründer finne forskaren som har arbeidd med det same spørsmålet, og ei bedrift kan verte kjend med studentane ho seinare vil rekruttere. Slike møte skjer lettare når folk er naboar. Det vi kan bidra med til eit slikt miljø, er fagfolk og kunnskap.

Det vil vere svært positivt med eit hotell med konferansefasilitetar. Der vil vi verte hotellkundar, både med konferansar, med gjestar til høgskulen og med studentar på samling i Volda. Og vi kan endå betre få vise fram høgskulen for fleire. Det viktigaste vi kan gje aktørane i Aasenkvartalet, er likevel ettertrakta kompetanse, gjennom samarbeid og forsking som kjem heile regionen vår til gode.

Aasenkvartalet er planlagt vegg i vegg med høgskulen. Den nærleiken er eit fortrinn for alle som vil etablere seg der, anten det er eit hotell eller eit innovasjonsmiljø. Studentane og forskarane våre er her uansett. Vegg i vegg, med eller utan leigeavtale.

Odd Helge Mjellem Tonheim
Rektor Høgskulen i Volda

Lesarinnlegg i Møre og Møre-Nytt 9. oktober 2026